Krabbamein í blöðruhálsi spyr hvorki um stað né stöðu og á mbl.is á síðasta ári var sagt frá Tim Commerford bassaleikara í hljómsveitinni Rage Against the Machine, sem greindist með meinið í fyrra þá 54 ára. Hann fór í brottnám á blöðruhálskirtlinum en var ráðlagt að sleppa tónleikaferð sem var fyrirhuguð tveimur mánuðum síðar.
Hann segist hafa ákveðið að opna sig um greininguna til að minna á mikilvægi þess að fara í skoðun og þekkja einkennin. Commerford sagði andleg áhrif þess að greinast með og berjast við krabbamein mikil. Hann hafi leitað stuðnings í stuðningshópum en að það hafi verið erfitt að tala um þetta. „Ég hef reynt að finna stuðningshópa, það er erfitt að finna fólk og erfitt að tala um þetta. Andlega eru skemmdirnar miklar og það er mjög erfitt fyrir mig að brotna ekki niður og tala um tilfinningar mínar,“ sagði Commerford.
„Ég talaði við minn lækni sem sagði að ég væri í frábæru formi svo það er fullt af fólki í góðu formi sem fær krabba. Ég ætlaði að líftryggja mig en það var ekki hægt því PSA mældist hátt hjá mér. Það var í byrjun lágt en ég fylgist með stöðunni og þegar það svo hækkaði fór ég í brottnám. Nú er ég kominn með niðurstöðu sex mánuðum eftir uppskurðinn og mælingar eru í núlli, sagði Tim.