Krabbameinsfélagið Framför stefnir á að opna félagsmistöð fyrir karla sem greinst
hafa með krabbamein í blöðruhálsi og aðstandendur þeirra í nýju heimili Framfarar
í Hverafold 1-3 í Grafarvogi.
Byrjum á að spyrja af hverju að skíra félagsmistöðina Hellirinn og skýringin er einföld.
Þegar rætt var um að hafa einhvers konar stað til að hittast á, hvort sem það er
einstaklingur að hitta einhvern til ræða sín mál, kom upp setningin: Við karlar erum
svo miklir hellisbúar, förum með okkar vandamál inní helli erum ekkert að tala um
vandann.
Er þörf á Hellinum?
Þá var lagt af stað og grunnspurningin var alltaf hvort það væri þörf fyrir svona stað
til að hittast á. Svarið var já – það þyrfti að vera staður sem menn geta komið einir
og rætt við einhvern sem þekkir af eigin raun þessi mál, hefur sjálfur gengið í gegnum
krabbamein og meðferð en veit líka um fleiri hliðar og aðrar meðferðir. Svo hefur
líka komið upp að aðstandendur, makar og vinir hafi samband með margar
spurningar.
Einhvers konar fyrsta hjálp
Reynsla okkar í Krabbameinsfélaginu Framför er að við áfall eftir greiningu er gott að
eiga fyrst samtal við einhvern með svipaða reynslu. Það þarf samt ekki endilega að
vera tveir að tala saman því maki, vinur eða aðstandi geta líka haft samband til að
átta sig á hvað er nú að fara í gegnum kollinn hjá sínum manni. Eða bara að sá
greindi komi með einhvern með sér, til dæmis aðstandenda, maka eða vin Lykilatriði
er að loka sig ekki inni í Hellinum heldur stíga aðeins út og sjá hvort heimurinn sé
nokkuð allur að hrynja.
Svo kom bylgja af hugmyndum
Eftir því sem fleiri hafa haft samband við Framför hefur hugmyndin þróast á
skemmtilegan hátt. Fólk, karlarnir og fleiri, vildu bara hittast til að spjalla saman,
bera saman bækur sínar og finna að þeir eru ekki aleinir á reki í ólgusjó.
Svo bættust við hugmyndir um að búa til gönguhóp, hittast yfir súpu, fá heimsókn
með ýmsa fræðslu og fleira. Þá var allt komið á flug og menn stungu uppá golfhóp,
fótbolta (svokölluðum bumbubolta eða horfa saman á leik), veiði (þá bera þeir saman
bækur sínar um góða veiðistaði og leynitrixin sín), handverk (t.d. hnýta flugur),
líkamsrækt (bera saman æfingastöðvar og hvaða æfingar henti best) og fleira og
fleira. Einn karl bauðst til að kenna mönnum að prjóna … fyrstu viðbrögð voru menn
misstu kjálkann en næstu viðbrögð: af hverju ekki?
Þessar frábæru hugmyndir verða síðan hugsaðar og mótaðar af okkur körlunum.